Cuideoidh ‘What’s that as Gaeilge? le foghlaimeoir ar bith na nathanna laethúla is coitianta i mBéarla a aistriú go Gaeilge ghroí ghasta. Soláthraíonn na teilgin chainte sa leabhar seo aistriúcháin shlachtmhara mar aon, más gá, le tagairtí cultúrtha dá macasamhla coibhéiseacha sa Bhéarla. Faightear go minic freisin sa lámhleabhar seo caint a bhfuil blas biliúil uirthi agus ar uairibh eile, Gaelscoilis – i. béarlagair na nGaelscoileanna. Feabhsóidh agus neartóidh na nathanna Gaeilge atá curtha ar fáil sna haistriúcháin uile saibhreas teanga na léitheoirí i gcomhair scrúduithe béil ar bith. Más mian le duine a stór teanga a mhaisiú nó é a dhéanamh níos ceolmhaire agus níos comhráití, cuirfidh What’s that as Gaeilge? le líofacht agus rithim na cainte dóibh. Is leabhar idéalach é seo do dhuine ar bith a bhfuil suim acu i scéimh, saibhreas agus saíocht na Gaeilge.